Wednesday, May 3, 2006

Pran pozisyon nou

Sanble baskilay la (shift) ap pran vitès plizanplis.  Se desizyon n ap pran kounye a ki pral suiv nou atravè gwo boulvès ki kapab vini. Sanble si nou fè wout sou kote kounye a, nou pap gen tan mete nou anplas pou lè siklòn dife a ap sou nou.  Se pou nou pran pozisyon nou pou dènye gwo etap inisyasyon an.
Posted by Djaloki at 22:48:24 | Permalink | Comments (3)

Saturday, December 10, 2005

M la, m pa la.

Jiska prezan, mwen resi kenbe fokis mwen sou enèji “anlè” yo, men se yon gwo batay chak fwa mwen sot deyò nan lari.  Reyalite anbyan an ba, li lou, li negatif, li fitil, li gen laperèz anpil, egal m ap viv nan yon lòt reyalite ki pa matche menm ak vibrasyon pi fò rès moun yo.  Mwen gen entansyon kenbe pwotokòl sa a.  Li pi bon pou mwen, e m kwè li ka pèmèt mwen ede lòt moun tou, men m pa konn ki efè segondè li ka genyen, m pa konn si li posib pou m kenbe konsa pandan m ap eseye fonksyone nòmalman nan Potoprens.  Sa fè m sonje Mèt Yechwa lè li te di “Mwen nan monn sa a, men mwen pa fè pati ladann”.  M ap suiv pou m wè…

Posted by Djaloki at 18:34:20 | Permalink | Comments (3)

Wednesday, March 23, 2005

Maryaj posmoden milti-kiltirel milti-spirityel

 

Yon kokennchenn kolonn lespri ap suiv mwen toupatou nan laviwonn m ap fe nan peyi Etazini.  Menm lot moun we yo!
 
2 zanmi m te mande m dirije selebrasyon maryaj yo nan Omaha, Nebraska.  M fe maryaj la dimanch, jou Ekinoks la.  Tet chaje !  Plis pase 200 moun anndan yon gwo gwo teyat  gwo liks.  Mwen te mare yon mouchwa blan nan tet mwen, sou fom bando Amerendyen.  Nou jete dlo, nou limen balenn, nou rele Lwa yo ak Zanset yo, yo te la, nou bay ofrann, nou bay wonm, te gen bon ti mizik yon Blak t ap jwe tou.
 
Moun ki te asiste yo di: Apre sa, moun pap ka marye jan yo te konn fe l anvan anko.  Moun ki ta pral marye byento di yo setoblije pral refe plan yo a zero.  Gen yon neg ki te bwe anpil, li di li ta renmen mwen fe maryaj pa l tou.  Mwen mande l si li genyen menaj, epi ki le l ap marye.  Li di li pa gen dat maryaj, li potko janm panse marye e li pa gen menaj.  Men li di sa se detay: kounye a l ap oblije jwenn youn vit vit paske, vle pa vle, menaj pa menaj, se pou mwen fe maryaj li!  Yon moun di defen manman l te vini le nou rele Zanset yo.  Li te tris le nou voye yo ale.  Gen yon lot ki di li pat janm konprann ki motivasyon ki te ka pouse moun marye.  Kounye a li konprann.  Plizye moun di yo komanse konprann Vodou, genyen ki vle al Ayiti.
 
Men, sa ki te plis make m, se yon neg ki gen Zanset Amerendyen ki vin pale ave m apre seremoni a.  Fo m di nou, mwen te voye ochan bay Zanset Amerendyen nan zon nan : Pawnee, Omaha, Ponca ak Otoe-Missouria.  Misye di m, le mwen te komanse nonmen non Pep Amerendyen yo, li t ap tann pou li we si mwen t ap vini sou Zanset pa li yo, paske li ra pou moun pale de yo.  Pi fo moun pa menm janm tande non yo, menm nan zon Nebraska.  Li se yon Otoe-Missouria.  Sa te touche li anpil pou li tande nonmen Zanset li yo, nan gwo kote sa a, ak tout doz respe sa a.
 
Ayibobo pou sa n pa we yo !
Posted by Djaloki at 05:26:11 | Permalink | Comments (2)

Sunday, December 19, 2004

Vodou ak Krisyanis (Kreyòl)

Men sa yon zanmi ap mande sou rapò Krisyanis ak Vodou.  Mwen gen entansyon bay dizon pa m sou sa pi ta, lè m gen plis tan.  Annatandan, nenpòt moun kapab kòmante osnon reponn kesyon yo.

Zanmi  a mande :

w a eskize m si mwen poze w tout kesyon sa yo: mwen ta
renmen konnen ki rapò krisyanis ak vodou? èske se
maryaj de relijyon sa yo ki senkretis la ? èske yon
bon jan grenn ayisyen ka yon kretyen? lè nou konsidere
kijan krisyanis la te rantre nan sen nou ak ki ravay
li ka fè lè nou mal konpran ni? kesyon sa yo ak anpil
lòt ankò mwen ta renmen ou ban m yon ti limyè souple.

Posted by Djaloki at 05:41:16 | Permalink | Comments (2)

Friday, December 17, 2004

Se pa nan lari pwoblèm nan ye (Kreyòl)

Anpil moun pè soti nan lari semèn sa a, akòz tire k ap fèt tout kote.  Tire yo pa ba m twòp pwoblèm.  Se sentom yo ye.  Yo jis montre aklè nan ki degre konfizyon, destriksyon, dejeneresans nou rive nan nivo nanm nou, sou plan kolektif la.  Eseye rezoud pwoblèm vyolans lan nan lari a p ap mennen nou okenn kote, toutotan nou pa atake mal la nan rasin li, egal anndan lespri moun.  Annatandan, sa k gen pou fèt ap fèt, wè pa wè.
 
Sou bò pa m, m ap kontinye fè sa pou m fè a, menm jan.  M pa di m ap fè enpridans, men kapon pa fè pati ni non m, ni siyati m. Lè m pa pran lari, se pa si tèlman pou ensekirite.  Nou gen anpil travay spirityèl pou nou fè.  Anpil lapriyè, meditasyon, pwoteksyon, gerizon, koreksyon, amonizasyon, vizyalizasyon, pwojeksyon, kreyasyon.  Se pa nan lari, ni nan palè, ni ak zam, ni ak lajan travay sa a ap fèt.  Se anndan kè nou, anndan nanm nou, anndan wogatwa nou, anndan peristil nou, ak lafwa nou, ak kouraj nou, ak pouvwa nou, ak Lwa nou yo, ak Zansèt nou yo.  Sa k pi eklere osnon pi konsyan yo, pi responsab.  Sa k pa konprann, ou pa nan batay, w ap kontinye vire won anplas…
 
~Djalòki~

Posted by Djaloki at 06:17:49 | Permalink | No Comments »